Muhabbat ka Aaghaz

Aaghaz to hota hai anjaam nahi hota
jab meri kahaani meiN Wo naam nahi hota

jab zulf ki kaalikh meiN ghul jaaye koi raahi
badnaam sahi lekin gumnaam nahii hota

haNs haNs ke jawaaN dil ke hum kyoun na chune TukdRe
har shaKhs ki kismat meiN inaam nahii hota

bahte huye aaNsoo ne aaNkhoN se kaha tham kar
jo may se pighal jaaye wo jaam nahi hota

din Doobe haiN ya Doobi baaraat liye kashti
saahil pe magar koi kohraam nahi hota